အခန်း (၉) ဘေဘီလုံမှ ရှေးဟောင်းစာချပ်များ
စိန့်ဆွစ်သင်းကောလိပ်
နော့တင်ဂမ် တက္ကသိုလ်
နီဝပ်-အွန်-ထရင့်
နော့တင်ဂမ်
၂၁ အောက်တိုဘာ ၁၉၃၄
ပါမောက္ခ ဖရန်ကလင်ဒဝဲလ်
တဆင့်/ ဗြိတိသျှ သိပ္ပံလေ့လာရေးအဖွဲ့
ဟီလာ၊ မက်ဆိုပိုတေးမီးယား
ပါမောက္ခကြီးခင်ဗျား
ဘေဘီလုံမြို့ဟောင်းနေရာမှ များမကြာမီက ပါမောက္ခကြီးတို့ တူးဖော်ရရှိခဲ့တဲ့ခုတ်ခွက်စာ၊ သို့မဟုတ် ရွှံ့စေးစာချပ်ငါးခုဟာ ပါမောက္ခကြီးရဲ့စာနဲ့ သင်္ဘောတခေါက်တည်း အတူပါလာပါတယ်။ ကျွန်တော့်အတွက်တော့ အတိုင်းအဆမရှိ စိတ်ဝင်စားစရာအတိပါပဲ၊ ဒီစာချပ်တွေ ဘာသာပြန်ရတာ နာရီပေါင်းများစွာကြာပါတယ်၊ ဒါပေမယ့် တကယ့်ကို ပျော်စရာ စိတ်ဝင်စားစရာပါ၊ ပါမောက္ခကြီးရဲ စာကို ချက်ချင်းပြန်မယ်ဆိုရင် ပြန်နိုင်ပေမယ့် ဘာသာပြန်တွေ့ပြီးတဲ့အထိ ကျွန်တော် စောင့်နေခဲ့ပါ တယ်။ စာချပ်တွေက မပျက်မစီး ရောက်လာပါတယ်၊ ထိန်းသိမ်းတဲ့ပစ္စည်းတွေ ဂရုတစိုက်သုံးထား တာ ထုပ်ပိုးပုံသိပ်ကောင်းတာတွေကြောင့်ပါပဲ။ ဒီစာချပ်တွေမှာပါတဲ့ ဇတ်လမ်းကိုဖတ်ရရင် ပါမောက္ခကြီးလဲ ကျွန်တော်တို့ သု တေသန ဓာတ်ခွဲခန်းက လူများလို အံ့ဩမိမှာပဲ၊ ရှေးခေတ်ကာလက လူတွေအကြောင်း မှတ်တမ်းစာဆိုရင် တဆောင့်တစ်ညပုံပြင်များလို စွန့်စားခန်းတွေ ချစ်လျှို့ဝှက်ဇာတ်လမ်းတွေ ဖတ်ရလိမ့်မယ်လို့ အများ မျှော်လင့်ကြမှာပါ။ ဒါပေမယ့် ဒီစာချပ်တွေမှာဖတ်ရတာက ဒါဗာဆားဆိုတဲ့ ပုဂ္ဂိုလ်တယောက် သူ့ ကြွေးမြီပြဿနာကို ဖြေရှင်းပုံအကြောင်း မှတ်တမ်းဖြစ်နေတယ်၊ ဒီစာတွေဖတ်ပြီး ဒီကမ္ဘာလောကကြီး ထဲက လူတွေရဲ့ဘ၀ဟာ နှစ်ပေါင်းငါးထောင်လောက် ကြာတဲ့ကာလအတွင်း ဘာမှပြောင်းလဲခြင်းမရှိခဲ့ ပါကလားလို့ တွေးမိရတယ်။ အတော်လေးထူးဆန်းတယ် ဆိုရမလားပဲ၊ ကျွန်တော့်တပည့်တွေ စကားအတိုင်းသုံးရရင် ဒီစာ တွေက ကျွန်တော့်ကို အတော်ပညာပေးလိုက်တယ်ခင်ဗျ၊ ပါမောက္ခတယောက်အနေနဲ့ ကျွန်တော်တို့က အစစအရာရာသိတဲ့လူ နားလည်တဲ့လူတယောက်လို့ ထင်ရတာပေါ့ဗျာ၊ ဒါပေမယ့် ဘေဘီလုံရှေးမြို့ ဟောင်းရဲ့ အုတ်ကျိုးအုတ်ပဲ့တွေ ဖုံအထပ်ထပ်တွေကြားက ပေါ်လာတဲ့ဒီပုဂ္ဂိုလ်က ကျွန်တော့်ကြွေးတွေ ကျေအောင်ဆပ်ဘို့သာမက ပိုက်ဆံအိတ်ထဲမှာ ငွေသံတချွင်ချွင်မြည်အောင် လုပ်ဘို့အတွက်ပါ ကျွန်တော် တခါမှမကြားဘူး စဉ်းလဲမစဉ်းစားဘူးတဲ့ နည်းလမ်းတွေ ပေးလိုက်တယ်ခင်ဗျ။ ရှေးခေတ်က ဘေဘီလုံတုန်းက အသုံးဝင်ခဲ့တဲ့ ဒီနည်းလမ်းဟာ ဒီကနေ့ လက်တွေ့ သုံးစွဲလို့ ရမရဆိုတာ အတော်စိတ်ဝင်စားစရာတခု ဖြစ်နေတယ်၊ ကျွန်တော်နဲ့ ကျွန်တော့်ဇနီးကတော့ ကျွန်တော် တို့ ငွေရေးကြေးရေးပြဿနာကို သူပေးတဲ့နည်းလမ်းနဲ့ ဖြေရှင်းလို့ ရမရကို တကယ်စမ်းကြည့်ဘို့ ဆုံးဖြတ်ထားကြပြီးပါပြီ။
ပါမောက္ခကြီးရဲ့ လုပ်ငန်းအရပ်ရပ် အောင်မြင်ပါစေကြောင်း ဆုမွန်ကောင်း တောင်းလိုက်ပါတယ်၊ နောက်ထပ် ကျွန်တော်ကူညီနိုင်တာရှိရင်လည်း ဆောင်ရွက်ပေးဘို့ အသင့်ရှိကြောင်းပါ။
လေးစားခင်မင်စွာဖြင့်
အဲဖရက်အိပ်(ချ)ရှရူး(စ)ဘာရီ
ရှေးဟောင်းသုတေသနဌာန
စာချပ်အမှတ် (၁)
ဆီးရီးယားပြည်တွင် ကျွန်တယောက်အဖြစ်သို့ ကျရောက်ခဲ့ပြီး မကြာမီက တိုင်းပြည်သို့ ပြန် လည်ရောက်ရှိခဲ့သော ကျွန်ုပ်ဒါဆားသည် ကျွန်ုပ်ကိုယ်တိုင် ကြွေးယူသဖြင့် တင်ရှိခဲ့သော ကြွေးမြီး များကို ပြန်လည်ပေးဆပ်လျှက် ကျွန်ုပ်ကိုယ်ကို ကျွန်ုပ်၏ ဇာတိမြို့ ဘေဘီလုံတွင် လူအများ လေးစား ယုံကြည်သူတဦးအဖြစ် ပြန်လည်ထူထောင်ရန် ပြင်းပြသော အာသီသရှိသည့်အားလျှော်စွာ ကျွန်ုပ်၏ အစီအစဉ်များကို စနစ်တကျ စီမံဆောင်ရွက်သွားနိုင်ရန်အတွက် ရွံ့ စေးစာချုပ်တွင် အရှည်တည်မည့် ဤမှတ်တမ်းအား ယခုလပြည့်နေ့ တွင် ရေးထွင်းခဲ့ပါ၏။ ကျွန်ုပ်၏ မိတ်ဆွေကောင်းကြီး မာသွန်ပေးအပ်သည့် တန်ဘိုးရှိလှသည့် အကြံဉာဏ်အတိုင်း ကျွန်ုပ်အား ကြွေးမြီးညွှန်တွင်းမှလွတ်ကင်၍ ဂုဏ်သိက္ခာရှိသောဘဝသို့ မြှင့်တင်နိုင်မည့် တိကျသော ဤအစီအစဉ်အတိုင်း လိုက်နာဆောင်ရွက်ရန် ကျွန်ုပ်အလေးအနက် အဓိဋ္ဌာန်ပြုသည်။ ဤအစီအစဉ်တွင် ကျွန်ုပ်၏မျှော်မှန်းချက်နှင့် အလိုဆန္ဒများကို ထင်ဟပ်သည့် ဦးတည်ချက် သုံးရပ်ပါရှိ၏။ ပထမ-ဤအစီအစဉ်တွင် အနာဂတ်ကာလ ကျွန်တော်၏ ချမ်းသာကြီးပွားရေးအတွက် လုပ် ဆောင်ရန် အချက်တခုပါ၏။ ယင်းအချက်အရ ကျွန်တော်ရရှိသမျှဝင်ငွေ၏ ဆယ်ပုံတစ်ပုံကို ရေရှည်ပိုင်ဆိုင်မှုအတွက် ကျွန်တော် သိမ်းဆည်းရမည်ဖြစ်၏။ အမြော်အမြင်ရှိသောမာသွန်က ဤသို့ဆိုခဲ့သည်။ “မိမိ၏ အသပြာအိတ်ထဲ၌ လောလောဆယ်မိမိသုံးစွဲ ရန်မလိုသော ရွှေစငွေ စကို ထည့်သွင်း သိမ်းဆည်း ထားနိုင်သူကား မိသားစုအတွက် ကောင်းကျိုးကို ဆောင်သူဖြစ်၏။ ဘုရင်မင်းမြတ်အပေါ် သစ္စာစောင့်သိ ရိုသေသူလည်းဖြစ်၏။ “အသပြာအိတ်ထဲ၌ ကြေးနီပြားအနည်းငယ်သာ ရှိသူသည် မိသာစုအတွက် မသိတတ်သူ ဘုရင်မင်းမြတ် ကိုလည်း လျစ်လျူရှုသူဖြစ်၏။ “အသပြာအိတ်ထဲ၌ အသပြာ တပြားတချပ်မျှမကပ်သူကား မိသားစုကိုလည်း မညှာတာ ဘုရင်မင်းမြတ် အပေါ်လည်း သစ္စာမစောင့်သိသူ ဖြစ်၏။ ထိုသူ၏နှလုံးသား၌ ခါးသည်းမှုအတိသာ ပြည့်နှက်လျက်ရှိ၏။ “ထို့ ကြောင့် မိမိ၏နှလုံးသားတွင်း၌ မိသားစုအတွက် မေတ္တာဓာတ်များ ပြည့်လျှမ်းနေလိုသူ၊ မိမိအရှင် ဘုရင်မင်းမြတ်ကိုလည်း သစ္စာစောင့်သိရိုသေလိုသူသည် အလိုဆန္ဒပြည့်ဝရန် အရာရာ စွမ်းဆောင် အောင်မြင်ရန်အတွက် မိမိအသပြာအိတ်အတွင်း၌ ရွှေဒင်္ဂါး ငွေဒင်္ဂါးသံ ချွင်ချွင်မြည်အောင် မပြတ်ထည့်သွင်း သိမ်းဆည်းထားနိုင်ဘို့လိုပေသည်။” ဒုတိယ- ဤအစီအစဉ်တွင် ကျွန်ုပ်၏ ဇနီးသည်နှင့် စပ်လျဉ်းသည့် အချက်တစ်ခုလည်းပါ၏။ ဖခင်နေအိမ်မှ ကျွန်ုပ်ထံသို့ သစ္စာရှိစွာ ပြန်လည်ရောက်ရှိလာသော ကျွန်ုပ်၏ ချစ်လှစွာသော ဇနီးသည် အား အဝတ်တန်ဆာမှအစ ပြည့်စုံအောင်ဖြည့်ဆည်းပံ့ပိုးရမည်ဖြစ်၏။ သစ္စာရှိသော ဇနီးမယားအား ကောင်းစွာ စောင့်ရှောက်ခြင်းသည် ယောက်ျားကောင်းတို့၏ နှလုံးသား၌ မိမိကိုယ်ကို လေးစားယုံကြည် စိတ်များ ပြည့်ဝ စေပြီး၊ မိမိ၏ ရည်မှန်းချက်များ အောင်မြင်အောင် အကောင်အထည်ဖော်ဆောင်မည့် သန္နိဋ္ဌာန်နှင့် သတ္တိ စွမ်းအားများအားလည်း ထက်မြက်စေနိုင်ကြောင်း မာသွန်ကဆိုခဲ့သည်။ ထိုအတွက် ကျွန်ုပ်ရရှိသမျှဝင်ငွေ၏ ဆယ်ပုံခုနှစ်ပုံကို မိသားစု သာယာချမ်းမြေ့မှု့အတွက် စားဝတ်နေရေးနှင့် အခြားအထွေထွေကိစ္စများတွင် သုံးစွဲရန် သတ်မှတ်ခန့် ခွဲထားရမည်ဖြစ်၏။ အဆိုပါ ဆယ်ပုံခုနှစ်ပုံထက် တစ်ပြားတစ်ချပ်မျှပင် ပို၍မသုံးစွဲမိအောင် စောင့်စည်းထိန်းသိမ်းရန်လည်း မိတ် ဆွေကြီးမာသွန်က အလေးအနက်ပြောဆို၏။ အစီအစဉ်၏ အောင်မြင်မှု မအောင်မြင်မှုသည် ဤ အချက်ပေါ်တွင်မူတည်ကြောင်း အခိုင်အမာသူဆို၏။ ဆယ်ပုံခုနှစ်ပုံဟူသော အတိုင်းအတာအတွင်း၌ သာ ရပ်တည်နေထိုင်ရမည်၊ ယင်းထက်ကျော်လွန်၍ ဝယ်ခြမ်းခြင်း သုံးစွဲခြင်း လုံးဝမရှိစေရ။ စာချပ်အမှတ် (၂) တတိယ- ဤအစီအစဉ်တွင် ကျွန်ုပ်၏ ကြွေးမြီများအား ကျွန်ုပ်ရရှိသော ဝင်ငွေမှဖဲ့၍ဆပ်သွား ရန် အချက်တရပ်လည်း ပါဝင်၏။ ယင်းအချက်အရ တလပြည့်မြောက်သည့်အခါ တိုင်း ကျွန်ုပ်ရရှိခဲ့သည့်ဝင်ငွေ၏ ဆယ်ပုံနှစ်ပုံကို ယူကာ ယင်းအား ကျွန်ုပ်အပေါ် ယုံကြည်စိတ်ချစွာ ချေးငှားခဲ့ကြသည့် ပုဂ္ဂိုလ်များသို့ အချိုးကျ ခွဲဝေပေးဆပ်ရမည်ဖြစ်၏။ ဤနည်းအားဖြင့် အချိန်တန်သော် ကျွန်ုပ်တင်ရှိသည့် ကြွေးမြီးများအားလုံး ကျေလည်မည်ဖြစ်၏။ ယင်းအတွက် ဤနေရာ၌ ကျွန်ုပ်အပေါ် ကြွေးမြီးတင်ရှိထားသူများ အမည်စာရင်းနှင့် တင်ရှိ သော ကြွေးမြီပမာဏတို့ကို အတိအကျ ကျွန်ုပ်ရေးထိုးမှတ်သားအပ်ပါ၏။
ဖါးရူး၊ ယက်ကန်းလုပ်ငန်းရှင်၊ ငွေဒင်္ဂါး ၂၊ ကြေးနီပြား ၆။
ဆင်ဂျာ၊ ပရိဘောဂပြုလုပ်သူ၊ ငွေဒင်္ဂါး ၁၊
အာမား၊ သူငယ်ချင်း၊ ငွေ ၃၊ ကြေး ၁၊
ဇန်ကား၊ သူငယ်ချင်း၊ ငွေ ၄၊ ကြေး ၇၊
အက်(ဖ)ကမား၊ သူငယ်ချင်း၊ ငွေ ၁၊ ကြေး ၃၊
ဟာရင်ဆား၊ လက်ဝတ်ရတနာလုပ်ငန်း၊ ငွေ ၆၊ ကြေး ၂၊
ဒီယာဘေကာ၊ ဖခင်၏မိတ်ဆွေ၊ ငွေ ၄၊ ကြေး ၁၊
အယ်(လ)ကဟတ်၊ အိမ်ပိုင်ရှင်၊ ငွေ ၁၄၊
မာသွန်၊ ငွေတိုးချေးသမား၊ ငွေ ၉၊
ဘီရယ်ဂျစ်၊ လယ်သမား၊ ငွေ ၊ ကြေး ၇၊
[မှတ်ချက်။ ။ အောက်ဖက်ပိုင်း၌ စာချပ်မှာ ပျက်စီးနေသည်။ဆက်ဖတ်၍မရ။]
စာချပ်အမှတ် (၃)
အဆိုပါ မြီးရှင်များထံ ကျွန်ုပ်တင်ရှိသည့် ကြွေးမြီစုစုပေါင်းမှာ ငွေဒင်္ဂါး ၁၁၉ ပြားနှင့် ကြေး နီပြား ၁၄၁ ပြားတိတိဖြစ်ပါသည်။ ထိုကြွေးမြီပမာဏကို ပေးဆပ်ရန် နည်းလမ်းရှာမရဖြစ်နေကာ မိုက်မဲသောအမှုများ ကျွန်ုပ်ကျူးလွန်ခဲ့မိ၏။ ဇနီးသည်အား သူ့ဖခင်အိမ်သို့ပြန်ရန် ကျွန်ုပ်ခွင့်ပြုခဲ့သည်။ ကျွန်ုပ်ကိုယ်တိုင်လည်း အရပ်တပါးတွင် လွယ်ကူသောနည်းလမ်းများအားဖြင့် ဓနဥစ္စာ ရရှိနိုင်မည်ဟု ယူဆကာ ဇာတိမြို့ရွာမှခွါခဲ့သည်။ သို့သော် ဘေးဒုက္ခမျိုးစုံကြုံကာ သူတပါးထံ ကျွန်အဖြစ် ရောင်းချ ခံရသည်အထိ ကျွန်ုပ်၏ဘဝ ကျဆင်းသွားခဲ့၏။ ( ယခုမူ မာသွန်ညွှန်ပြသဖြင့် ကျွန်ုပ်၏ ကြွေးမြီးများကို ကျွန်ုပ်၏ဝင်ငွေမှ အနည်းငယ်စီဖဲ့၍ ဆပ်ခြင်းဖြင့် ပြီးပြေနိုင်ကြောင်း သိရှိခဲ့ပြီ။ ကိုယ်တိုင် အသုံးအဖြုန်းကြီးခြင်းကြောင့် ဖြစ်ပေါ်သည့် ပြဿနာများမှ တိမ်းရှောင်ထွက်ပြေးခဲ့ခြင်းမှာ အလွန်အကျူး ရူးသွပ်မိုက်မဲခြင်းသာဖြစ်ကြောင်းလည်း ရှိ မြင်ခဲ့ပြီ။ ထို့ကြောင့် ကြွေးရှင်များအားလုံးထံ ကျွန်ုပ်သွားရောက်ကာ ကျွန်ုပ်၌ လုပ်အားဖြင့် ဝင်ငွေရှာ ရန်မှအပ အခြားနည်းလမ်းမရှိကြောင်း၊ ဤနည်းဖြင့် ကြိုးစားရှာဖွေရရှိသည့် ဝင်ငွေ၏ ဆယ်ပုံနှစ်ပုံကို ကြွေးရှင်များအားလုံးသို့ မျှတခွဲဝေကာ လစဉ်မှန်မှန် ဆပ်သွားမည်ဖြစ်ကြောင်း၊ သည့်ထက်ပို၍ ပေး ချေရန်ကာ။ ကျွန်ုပ်တတ်နိုင်မည်မဟုတ်သဖြင့် ၎င်းတို့အနေနှင့် စိတ်ရှည် သည်းခံကြစေလိုကြောင်း၊ တချိန်တွင်တော့ ကြွေးမြီးအားလုံး မုချလည်ရမည်ဖြစ်ကြောင်း တင်ပြပြောဆိုသည်။ ကျွန်ုပ်၏ အခင်မင်ဆုံးမိတ်ဆွေဟု ယူဆထားခဲ့သော အာမားသည် ကျွန်ုပ်အား ခါးခါးသည်း သည်း ဆဲရေပြစ်တင်ပြောဆိုရာ ကျွန်ုပ်မှာ သူ့အိမ်မှ အလွန်စိတ်ပျက်ဝမ်းနည်းစွာ ပြန်လာခဲ့ရ၏။ လယ်သမားတဦးဖြစ်သူ ဘီရယ်ဂျစ်ကမူ သူ့မှာငွေကြေးကြပ်တည်းလွန်းသည်ဖြစ်၍ သူ့ကြွေးမြီးများကို အရင်ဆုံးဆပ်ပေးရန်သာ ထပ်တလဲလဲ ပန်ကြားပြောဆိုခဲ့သည်။ အိမ်ပိုင်ရှင် အယ်(လ)ကဟတ်သည် လည်း လုံးဝညှိနှိုင်းရခက်သော ပုဂ္ဂိုလ်တဦးဖြစ်သည်။ သူ့ငွေကို အမြန်ဆုံး အကျေအလည်မပေးလျှင် ပြဿနာ ရှာမည်ဖြစ်ကြောင်း ကြိမ်းမောင်းပြောဆိုသည်။ သို့သော် ကျန်လူများအားလုံးကား ကျွန်ုပ်၏ အစီအစဉ်ကို လိုလိုလားလားပင် လက်ခံခဲ့ကြသည်။ ကျွန်ုပ်အနေနှင့် ကြွေးကို ရှောင်တိမ်းထွက်ပြေးခြင်းထက် ကျေလည်အောင်ပေးဆပ်ခြင်းက ပို၍ သက်သာ သေးကြောင်း လက်တွေ့ သိရပြီးဖြစ်ရာ ယခုကဲ့သို့ ကြွေးရှင်များထံမှ ထောက်ခံအားပေးမှု ရရှိ သည့် အခါ၌မူ အစီအစဉ်ကို ပြီးမြောက်အောင် အကောင်အထည်ဖော်လိုစိတ်များ ပို၍ ပြတ်သား ခိုင်မာလာ ခဲ့ရသည်။ အချို့သောကြွေးရှင်များ၏ လတ်တလောအလိုဆန္ဒများနှင့် တောင်းဆိုချက်များကို ကျွန်ုပ်လိုက်နာ နိုင်မည်မဟုတ်ပါ။ သို့သော် အားလုံးအပေါ် မျှမျှတတ ဖြစ်အောင်ကား ကျွန်ုပ်အားထုတ် ဆောင်ရွက် သွား မည် ဖြစ်ပါသည်။
စာချပ်အမှတ် (၄)
နောက်တစ်ကြိမ် လပြည့်ပြန်ပြီ။ လွတ်လပ်သူတဦး၏စိတ်ဓာတ်ဖြင့် ကျွန်ုပ်ကြိုးပမ်းလုပ်ကိုင်ခဲ့ သည်။ ကျွန်ုပ်၏ ဇနီးသည်ကလည်း ကြွေးဆပ်ရေးအစီအစဉ်ကို ထောက်ခံအားပေးခဲ့သည်။ ပြီးခဲ့သည့် လအတွင်း ကုန်သည်ကြီးနီဗာထူးအတွက် ကြံ့ခိုင်သန်မာသည့် ကုလားအုတ်ကောင်းများ ဝယ်ပေးခြင်း အလုပ်မှ ငွေဒင်္ဂါး ဆယ့်ကိုးပြားတိတိ ကျွန်ုပ်ရရှိခဲ့သည်။ သည်ငွေကို မူလအစီအစဉ်အတိုင်း ကျွန်ုပ်ဝေပုံချသည်။ ဆယ်ပုံတစ်ပုံကို စုဆောင်းငွေအဖြစ် သိမ်းဆည်းထားလိုက်သည်။ ဆယ်ပုံခုနှစ်ပုံကိုကား အိမ်စရိတ်အဖြစ် ဇနီးသည်နှင့်အတူ သုံးစွဲရန် ချန်သည်။ ကျန်နှစ်ပုံကိုမူ ကြေးနီပြားများအဖြစ် ဖလှယ်တွက်ချက်ကာ ကြွေးရှင်အသီးသီးသို့ အချိုးကျ ခွဲဝေသည်။ ကြွေးများကိုလိုက်ဆပ်သည့်အခါ အာမားကိုမတွေ့ရ။ သူ့ ဇနီးထံ ပေးထားခဲ့ရသည်။ ဘီ ရယ်ဂျစ်ကား ဝမ်းမြောက်လွန်းသဖြင့် ကျွန်ုပ်၏လက်ကိုပင် နမ်းရှုပ်သည်။ အယ်(လ)ကဟတ်ကြီး တစ်ဦးတည်းသာ မြန်မြန်ကြေအောင်ဆပ်ရန် မြည်တွန် တောက်တီး ပြောဆိုသည်။ ကျွန်ုပ်လည်း စိတ်အနှောက် အယှက်ကင်းစွာ လုပ်ကိုင်ရှာဖွေခွင့် ရမည်ဆိုကာ ယခုထက်မြန်မြန် ပေးဆပ်နိုင်မည်ဖြစ်ကြောင်း ကုန့် ပြန်ပြောဆိုခဲ့သည်။ အခြားသောသူများက ကျွန်ုပ်ကို ကျေးဇူးတင်ကြပြီး ကျွန်ုပ်၏ အားထုတ်မှု့ အတွက်လည်း ချီးကျူးစကား ဆိုကြသည်။ သို့နှင့် ပထမတစ်လအကုန်မှာပင် ကျွန်ုပ်၏ကြွေးမြီများထဲမှ ငွေဒင်္ဂါး လေးပြားနီးပါး လျော့သွား ခဲ့ပြီး၊ ကျွန်ုပ်၏ သီးခြားကိုယ်ပိုင်ဝင်ငွေအဖြစ်လည်း ငွေဒင်္ဂါးနှစ်ပြားနီးပါးမျှ စုဆောင်းမိခဲ့သည်။ နှစ်ပေါင်း များစွာအတွင်း ပထမဆုံးအကြိမ်အဖြစ် ပေါ့ပါးရွှင်လန်းမှု့အရသာကို ကျွန်ုပ်ဝမ်းမြောက် ကြည်နူးစွာ ခံစားလိုက်ရသည်။ ဝိုင်းဝိုင်းစက်စက်လမင်း ထွန်းလင်းလာပြန်ပါပြီ။ သည်လလည်း ကျွန်ုပ် အလုပ်ကျိုးစားခဲ့သည်။ သို့သော် အောင်မြင်မှု့မရခဲ့။ ကုလားအုတ် များများစားစား ဝယ်၍မရနိုင်ခဲ့။ ထို့ ကြောင့် လုပ်အားခ အဖြစ် ငွေဒင်္ဂါး တဆယ့်တပြားသာရသည်။ သို့သော် ကျွန်ုပ်၏ ဇနီးသည်လည်း ကြံ့ကြံ့ ခံရှာပါသည်။ မူလ အစီအစဉ်အတိုင်းပင် ကျွန်ုပ်တို့ ကြိုးစားရပ်တည်သည်။ အဝတ်အထည်သစ် လုံးဝ မဝယ်၊ အသားမစား ဟင်းသီးဟင်းရွက်သာ ဝယ်ခြမ်းစားသည်။ ငွေဒင်္ဂါး ဆယ့်တပြား၏ ဆယ်ပုံ ခုနှစ်ပုံဖြင့်ပင်လောက်အောင် နေသည်။ ဆယ်ပုံတစ်ပုံကို စုသည်။ ဆယ်ပုံနှစ်ပုံကို ကြွေးဆပ်သည်။ ကျွန်ုပ်၏ ဆပ်ငွေလေး နည်းပါးလှသော်လည်း အာမားက ချီးကျူးစကားပြောဆိုရာ ကျွန်ုပ် အံအားပင်သင့် သွားမိရသည်။ ဘီရယ်ဂျစ်ကလည်း ထိုနည်းတူပင်။ အယ်(လ်)ကဟတ်ကတော့ နည်းသွားရ ကောင်းလားဟု ဒေါသထွက်ကာ ပြစ်တင်မောင်မဲ ပြောဆိုသည်။ နည်းလွန်း၍ မယူချင်လျှင်လည်း ပြန်ပေးလိုက်ပါဟု ပြောသည့်အခါ၌မူ နှုတ်ဆိတ်သွားသည်။ အခြားပုဂ္ဂိုလ် များကတော့ အေးအေး ဆေးဆေးပင်။ ယခုလပြည့်မှာတော့ ကျွန်ုပ် အကြီးအကျယ် ဝမ်းမြောက်ရပြီ။ အလွန်ထွားကြိုင်းလှပသည့် ကုလားအုတ်ကြီးတစ်အုပ်တွေ့ရပြီး သည်အထဲမှ ကောင်းပေ့ ညွန့်ပေ့ဆိုသည်များကို ရွေးဝယ်နိုင်ခဲ့ရာ ငွေဒင်္ဂါး လေးဆယ့်နှစ်ပြားပင် ကျွန်ုပ်အတွက်ရခဲ့သည်။ ကျွန်ုပ်တို့ဇနီးမောင်နှံအတွက် အထူးလိုအပ်နေသည့် ဖိနပ်နှင့် အဝတ်အထည်များ ဝယ်နိုင်ခဲ့သည်။ ကြက်သား အမဲသား ငါးများလည်း စားသောက်နိုင်ကြသည်။ ငွေဒင်္ဂါး ရှစ်ပြားကျော်မျှ ကြွေးဆပ်နိုင်ရာ ခါတိုင်း ပူညံပူညံလုပ်သည့် အယ်(လ)ကဟတ်ပင် သည်တစ်ကြိမ် ဘာမျှမပြောတော့။ အစီအစဉ်က ကောင်းလှသည်။ သည်အစီအစဉ်ကြောင့် ကျွန်ုပ်တို့ ကြွေးမြီးတွေလည်း ကုန်အောင် ဆပ်နိုင်မည်။ တစ်ဖက်ကလည်း ဖြည်းဖြည်းချင်း စုဆောင်းမိလာသည်။ ဤစာချပ်၌ ဆက်လက်ရေးသားမိသည်မှာ သုံးလခန့်ပင်ရှိသွားပြီ။ ယင်းကာလအတွင်း လစဉ်ပင် ဆယ်ပုံတစ်ပုံ စုဆောင်းခြင်း၊ ဆယ်ပုံခုနှစ်ပုံကို စားသုံးခြင်း၊ ဆယ်ပုံနှစ်ပုံကို ကြွေးဆပ်ခြင်း များ တိတိကျကျ မှန်မှန်ကန်ကန်ပင် ဆက်လက်လုပ်ဆောင်ဖြစ်ခဲ့သည်။ ယခုဆိုလျှင် ကျွန်ုပ်၏ အသပြာအိတ်၌ ငွေဒင်္ဂါး နှစ်ဆယ့်တပြားမျှရှိခဲ့ပြီ။ ၎င်းတို့အားလုံးပင် ကျွန်ုပ်ပိုင်ငွေ စစ်စစ်ဖြစ်သည်။ အိတ်ထဲတွင် သည်ငွေရှိထားသဖြင့် လမ်းလျှောက်သည့်အခါ ခေါင်း မတ်မတ် ထားနိုင်သည်။ မိတ်ဆွေ သင်္ဂဟအများကြား ရဲရဲဝံ့ဝံ့ ဖြတ်သန်းသွားလာနိုင်သည်။ ကျွန်ုပ် ၏ဇနီးသည် နေအိမ်ကို တတ်နိုင်သမျှသပ်ရပ်အောင် ထိန်းသိမ်းပြုပြင်သည်။ သူကိုယ်တိုင်လည်း လှပ တင့်တယ်စွာ ဝတ်စားဆင်ယင်နိုင်လာသည်။ ကျွန်ုပ်တို့အိမ်ထောင်ရေးဘဝ သာယာချမ်းမြေ့ လာသည်။ အစီအစဉ်အား အဘိုးမဖြတ်နိုင်လောက်အောင် အကျိုးကျေးဇူးကြီးမားလှသည်ဟု ဆိုရပေမည်။ ကျွန်ုပ်ကဲ့သို့ ကျေးကျွန်ဘဝ ကျရောက်ခဲ့ပြီးသူတဦးကိုပင် လူအများအသိအမှတ်ပြုသည့် အဆင့်ရောက် အောင် ပြန်လည် မြှင့်တင် ပေးနိုင်ခဲ့သည်မဟုတ်လား။
စာချပ်အမှတ် (၅)
နောက်တစ်ကြိမ် လဝန်းရွှန်းပပြန်ပါပြီ။ ငါ့ စာချပ်များမှာ ရေးထိုးမှတ်တမ်းတင်မှု့ မပြုခဲ့မိတာ ကာလကြာခဲ့ပြီ။ တိတိကျကျဆိုရသော် ဆယ့်နှစ်လမျှပင် ကျော်လွန်ခဲ့ပြီဟု ဆိုရလိမ့်မည်။ သည်ကနေ့ တွင်တော့ မှတ်တမ်းကို မရေး၍မဖြစ်တော့။ အကြောင်းမူ သည်ကနေ့သည် ကျွန်ုပ်၏ နောက်ဆုံးလက် ကျန် ကြွေးမြီးများ အပြီးသတ် ပေးဆပ်လိုက်နိုင်သည့်နေ့ ဖြစ်သောကြောင့်တည်း။ ။ ကျွန်ုပ်၏ နှစ်သက်ဖွယ်ကောင်းလှသော ဇနီးသည်နှင့် မိမိကိုယ်တိုင်အပေါ် အထူးနှစ်ခြိုက်အားရနေမိသော ကျွန်ုပ် တို့နှစ်ဦးသားသည် ကျွန်ုပ်တို့၏အဓိဌာန်ကြီး ပြီးမြောက်အောင်မြင်သည့် အထိမ်းအမှတ်အဖြစ် အမှတ်တရ ညစာစားပွဲတစ်ခု အတူတကွ ယနေ့ဆင်နွှဲကြသည်။ နောက်ဆုံးအခေါက်အဖြစ် ကြွေးရှင်များထံ သွားရောက်ရာ၌လည်း ထူးထူးခြားခြား ပြောစမှတ် ပြုစရာများ ကျွန်ုပ်ကြံခဲ့၏။ အာမားက ကျွန်ုပ်အား ကြမ်းတမ်းသောစကားများ ဆိုခဲ့မိခြင်း အတွက် တောင်းပန်ပြီး၊ ကျွန်ုပ်သည် သူနှစ်သက်လိုလားဆုံး မိတ်ဆွေတဦးဖြစ်ပါကြောင်း ဖွင့်ဟ ပြောဆို၏။ အယ်(လ)ကဟတ်ကြီးလည်း ယခုမဆိုးတော့ပြီ။ သူက “တစ်ချိန်တုန်းက မင်းဟာရွှံ့စေးပျော့ ပဲ၊ ဖိလိုက်ရင် ပြားသွားတယ်၊ ထုစရာထောင်းစရာ မလိုဘူး၊ လူတကာလက်နဲ့ အသာလေးပုံသွင်းလို့ ရတယ်၊ အခု မင်းဟာ ကြေးဝါတုံးတစ်တုံးလို မာကြော သွားပြီ၊ ထက်တဲ့ရှတဲ့ ဇောင်းရှိသွားပြီ၊ နောင်ကို မင်းအလိုရှိရင်လာပါ၊ ရွှေလိုသလား ငွေလိုသလား ငါကူညီဘို့ အသင့်ပဲ” ဟုဆိုသည်။ ကျွန်ုပ်အား အထင်ကြီးလေးစားသွားသူမှာ သူတဦးတည်းသာမဟုတ်ပေ။ လူအများအပြားပင် ကျွန်ုပ်အား အရေးတယူ ဆက်ဆံပြောဆိုလာကြသည်။ ဇနီးသည်၏ အကြည့်က တောက်ပရွှင်လန်း လာသည်။ ခင်ပွန်းသည်အား တန်ဘိုးထားသည့် နှစ်လိုဖွယ် အကြည့်မျိုး။ သည်အကြည့်မျိုးသည် ခင်ပွန်းသည်တဦးအား မိမိကိုယ်ကို ယုံကြည်မှု စိတ်ဓာတ်များ ပြည့်ဝလာစေမြဲဖြစ်သည်။ ချုပ်၍ဆိုရလျှင်မူ ကျွန်ုပ်ယခုကဲ့သို့ အောင်မြင်မှုရရှိခဲ့ခြင်းသည် ကျွန်ုပ် တိတိကျကျ လိုက်နာ ဆောင်ရွက်ခဲ့သော အစီအစဉ်” ကြောင့်သာဖြစ်သည်ဟု အလေးအနက်ဆိုရပေမည်။ သည်အစီအစဉ် ကြောင့် ကြွေးမြီးအားလုံး ကျေအောင်ဆပ်နိုင်ခဲ့သည်။ အိတ်ထဲတွင် လှုပ်လိုက်တိုင်း အသံမြည်သည့် ရွှေစ ငွေစများ ပြည့်တင်းအောင် ထည့်သွင်းနိုင်ခဲ့သည်။ ထို့ကြောင့် ကြီးပွားချမ်းသာလိုသူ မိမိဘဝ တိုးတက်မြင့်မားလိုသူတိုင်းအား ကျွန်ုပ်၏ အစီ အစဉ်အတိုင်း လိုက်နာကျင့်ကြံကြပါဟု ထောက်ခံ အကြံပြုလိုပါသည်။ ကျွန်ုပ်ကဲ့သို့ ငွေဝယ်ကျွန် ဟောင်း တစ်ယောက်ကိုပင် ကြွေးကျေအောင် ဆပ်နိုင်သူ၊ ပိုက်ဆံအိတ်ထဲတွင် ရွှေဒင်္ဂါးအပြည့် ထည့်နိုင်သူတဦးဖြစ်အောင် ပြောင်းလဲပေးနိုင်သည်ဆိုက တကယ်စိတ်အားထက်သန်သော မည်သည့် ပုဂ္ဂိုလ်ကိုမဆို ကြီးပွားတိုးတက်အောင် မြှင့်တင်ပေးနိုင်မည်မှာ မုချမလွဲပေ။ ကျွန်ုပ်ကိုယ်တိုင်လည်း သည်အောင်မြင်မှု့နှင့် တင်းတိမ်မည် မဟုတ်ပါ။ ဤအစီအစဉ်၏ တန်ခိုးစွမ်းအားကို ကိုယ်တွေ့ သိရှိထားပြီးဖြစ်ရာ ရှေ့သို့ ဆက်၍ လူချမ်းသာများအကြား အောင်မြင် ထင်ရှားသော ပုဂ္ဂိုလ်တဦးဖြစ်အောင် မမှိတ်မသုံ အားထုတ် ကြိုးပမ်းသွားမည် ဖြစ်ပါသည်။
စိန့်ဆွစ်သင်းကောလိပ်
နော့တင်ဂမ်တက္ကသိုလ်
နီ ဝပ်-အွန်-ထရင့်
၇ နိုဝင်ဘာ ၁၉၃၆
ပါမောက္ခဖရန်ကလင်ကော့ဒဝဲလ်
တဆင့်/ဗြိတိသျှသိပ္ပံလေ့လာရေးအဖွဲ့
ဟီလာ၊ မက်ဆိုပိုတေးမီးယား
ပါမောက္ခကြီးခင်ဗျား
ဘေဘီလုံမြို့ဟောင်းကို ဆက်လက်တူးဖော်တဲ့နေရာမှာ အကယ်၍များ အဲဒီမှာ ဟိုးရှေးရှေးက နေထိုင်ခဲ့ဘူးတဲ့ ဒါဗာဆားဆိုတဲ့ ကုလားအုတ် ကုန်သည်ကြီးတဦးရဲ့ တစ္ဆေနဲ့ တွေ့ခဲ့မယ်ဆိုရင် တခုလောက် ကျေးဇူးပြုပြီး ပြောပေးစမ်းပါ။ ရှေးပဝေသဏီကာလက သူရေးခဲ့တဲ့ ရွှံ့စေး စာချပ်တွေ အတွက်ကို ဒီကနေ့ အင်္ဂလန်ပြည်မှာနေတဲ့ တက္ကသိုလ်ဆရာ လင်မယားက အစဉ်ထာဝရ ကျေဇူးတင် နေပါ တယ်ဆိုတဲ့ အကြောင်းပါ။ ဒီပုဂ္ဂိုလ်ရဲ့ အစီအစဉ်အတိုင်း ကြွေးနွံထဲက လွတ်အောင် ရုန်းဘို့၊ တစ်ချိန်တည်းမှာ ပိုက်ဆံအိတ် ထဲမှာလည်း ရွှေသံငွေသံ မြည်စေဘို့ ကျွန်တော်တို့ ဇနီးမောင်နှံ ကြိုးစားကြမယ်ဆိုတဲ့အကြောင်း အရင် တနှစ်ကရေးတဲ့ ကျွန်တော့်စာထဲမှာ ဖော်ပြခဲ့တာ ပါမောက္ခကြီး အမှတ်ရကောင်းရပါလိမ့်မယ်။ မိတ်ဆွေတွေကို ဖွင့်မပြောခဲ့ပေမယ့် ကျွန်တော်တို့မှာ အတော်လေး ငွေကြေးအကြပ်အတည်း ကြုံနေတဲ့ အကြောင်း ပါမောက္ခကြီးလည်း ရိပ်မိခဲ့မှာပါ။ ကျွန်တော်တို့ကို ကြွေးနှိပ်စက်နေခဲ့တာ နှစ်ပေါင်းများစွာ ကြာခဲ့ပါပြီ။ ကြွေးဟောင်းတွေက တဖြည်း ဖြည်းတက်လာတော့ အကယ်၍ မကျေနပ်တဲ့ ကြွေးရှင်တယောက်ယောက်ကများ တိုင်လား တောလား လုပ်ရင် ဟိုးလေးတကြော်ကြော်ဖြစ်ပြီး တက္ကသိုလ်က ထွက်ရတဲ့အထိ ပြဿနာ တက်မှာ လည်း ကျွန်တော်တို့ အမြဲ ကြောက်နေခဲ့ရတယ်။ ရတဲ့ဝင်ငွေထဲက တတ်နိုင် သလောက်တော့ ဖဲ့ဖဲ့ပြီး ဆပ်နေ တာပဲ။ ဒါပေမယ့် အဝင်နဲ့ အထွက်မမျှဘူး။ နောက်ထပ်လိုအပ်တဲ့ပစ္စည်းကျတော့ မလွဲမရှောင်သာ အကြွေးနဲ့ပဲ ထပ်ယူရတယ်။ အဲဒီအခါ လက်ငင်းထက်ပိုကုန်ကျတော့ မလိုအပ်ဘဲ တစ်ဖက်က နှိပ်စက်ခံ နေရပြန်တယ်။ ကြိုးစားပမ်းစား ဖြေရှင်းတဲ့ကြားက ပြဿနာက လျော့ပါးမသွားဘူး။ ကြွေးသံသရာထဲ ပတ် ချာလည်ပြီး အခြေအနေသာဆိုးသထက် ဆိုးလာတယ်။ အိမ်ရှင်ဆီမှာ ကြွေးတင်နေတော့ သူ့ထက်ဈေး သက်သာတဲ့အခန်းကိုလည်း ပြောင်းလို့ မရဘူး။ တခြားလဲ ဒီလိုပဲ သက်သာရာ သက်သာကြောင်း လုပ်လို့ ရတဲ့ကိစ္စ ရှာမရသလို ဖြစ်နေတယ်။ ကျွန်တော်တို့ အနေအထားက ထွက်ပေါက်မရှိတဲ့ ကြွေး ဆောင်ချောက်ထဲ ပိတ်မိနေသလိုမျိုး။ အဲဒီအချိန်မှာ ပါမောက္ခကြီးနဲ့ ဆက်စပ်သိကျွမ်းရတဲ့ ရှေးခေတ် ဘေဘီလုံသား ကုလားအုတ် ကုန်သည်ကြီးက ကျွန်တော်တို့အတွက် လုံးဝအံဝင်ဂွင်ကျဖြစ်မယ့် အစီအစဉ်တခု ပေးလာတယ်။ သူ့ နည်းစနစ်ကို ကျွန်တော်တို့ အရမ်းသဘောကျပြီး အဲဒီအတိုင်းလိုက်လုပ်ဖို့ ဆုံးဖြတ်ကြတယ်။ ကျွန်တော် တို့ တင်နေတဲ့ကြွေးတွေကို တိတိကျကျ စာရင်းချရေးတယ်။ ပြီးတော့ ကြွေးရှင်တွေဆီလည်ပြီး ဒီစာရင်းကိုပြတယ်။ သူတို့နဲ့ ဆွေးနွေးတယ်။ အခု ဒီပုံစံအတိုင်းဆက်စခန်းသွားနေရင် ဒီကြွေးတွေ ကျွန်တော်တို့ ဘယ်နည်းနဲ့မှကျေအောင် ဆပ်နိုင်မှာ မဟုတ်တော့ဘူးဆိုတာ ပြောပြတယ်။ စာရင်းကိုကြည့်ယုံနဲ့ သူတို့လည်း သဘောပေါက် တယ်။ အဲဒီနောက် သူတို့ ကြွေးတွေကို ကျေအောင်ဆပ်ပေးနိုင်မယ့် တခုတည်းသောနည်းလမ်းက ကျွန် တော့်အနေနဲ့ လစဉ်ဝင်ငွေရဲ့ နှစ်ဆယ်ရာခိုင်နှုန်းကို သီးသန့်ဖဲ့ပြီး အဲဒါတွေကို ကြွေးရှင်တွေအားလုံး အတွက် အချိုးကျ မျှဆပ်တဲ့နည်းသာဖြစ်တယ်။ အဲဒီလိုဆပ်ရင် နှစ်နှစ်ကျော်လောက်အတွင်းမှာ ကြွေး အားလုံး ကျေလိမ့်မယ်။ ဒီအတောအတွင်းမှာတော့ သူတို့ဆိုင်တွေက မသုံးမဖြစ်တဲ့ ပစ္စည်းဝယ်ရင် လက်ငင်းငွေချေစနစ်နဲ့ပဲ ဝယ်မယ်။ အဲဒီအစီအစဉ်ကို သူတို့လက်ခံပါလို့ ရှင်းလင်းပြောပြတယ်။ ဒီလူတွေအားလုံး ယဉ်ကျေးမှုရှိတဲ့ ပုဂ္ဂိုလ်တွေချည်းပါပဲ။ ပြောရမခက်ပါဘူး၊ ကျွန်တော်တို့ ဝယ်နေကျ ကုန်စိမ်းဆိုင်ရှင်ဆိုရင် တော်တော် အမြော်အမြင်ရှိတဲ့ပုဂ္ဂိုလ်။ “နောက်ထပ်ဝယ်တာကို လက်ငင်းပေးမယ်။ အရင်ကြွေးဟောင်းလည်း နည်းနည်းချင်း ဖဲ့ဆပ်ဦးမယ်ဆိုရင်တော့ ဘာပြောစရာ ရှိသေးလည်းဗျာ၊ အရင်တုန်းကထက် အများကြီးကောင်းသွားတာပေါ့ ။ ခင်ဗျားကျုပ်ကို ပိုက်ဆံမပေး ကာ သုံးနှစ်တောင်ရှိပြီဗျ” တဲ့။ သူပြောတဲ့စကားက တခြားလူတွေပါ အလွယ်တကူ သဘောပေါက် အောင် ကူရှင်းပေးနိုင်ခဲ့တယ်။ အဲဒီနောက် သူတို့နာမည်တွေအားလုံးပါဝင်တဲ့ သဘောတူညီချက်တစ်ခု ကျွန်တော် ညှိနှိုင်းယူ ခဲ့တယ်။ ကျွန်တော့်ဝင်ငွေရဲ့ နှစ်ဆယ်ရာခိုင်နှုန်းကိုသာ မှန်မှန်ဆပ်နေမယ်ဆိုရင် သူတို့ဘက်က ကျွန်တော်တို့ကို ဘာအနှောက်အယှက်မှ မပေးဘူးဆိုတဲ့ ကတိပြု ချက်ခုပေါ့။ ဒီကတိရပြီးတဲ့နောက် ကျွန်တော်တို့ အစီအစဉ်တွေ တိတိကျကျချတယ်။ ဝင်ငွေရဲ့ ခုနှစ်ဆယ်ရာခိုင်နှုန်းနဲ့ လောက်အောင် သုံးစွဲ နေထိုင်ဘို့ ၊ ဘယ်ရာခိုင်နှုန်းကိုတော့ ငွေသံ ရွှေသံကြားနေရအောင် အိတ်ထဲထည့် စုဆောင်းဘို့ စသဖြင့်ပေါ့ ။ နောင်တစ်နေ့မှာ ရွှေတွေငွေတွေ စုဆောင်းမိလာနိုင်တယ်ဆိုတာ စဉ်းစားမိယုံနဲ့တင် လူက အများကြီးအားတက်တယ်။ ငွေကြေးသုံးစွဲမှုနဲ့ ပတ်သတ်တဲ့ အဲဒီအပြောင်းအလဲကြီးလုပ်လိုက်ရတာ စွန့်စားခန်းတစ်ခု ဆင်နွှဲ ရသလိုပါပဲ။ ခုနှစ်ဆယ်ရာခိုင်နှုန်းနဲ့ အဆင်ပြေအောင်နေဘို့ လင်မယားနှစ်ယောက် နည်းလမ်းတွေ ရှာကြတယ်။ တွက်ကြချက်ကြတယ်။ ပထမဆုံး အိမ်ငှားခ သက်သာဖို့ ကိစ္စ စီမံကြတယ်။ အဲဒီနောက် လက်ဖက်ခြောက်ကအစ နာမည်ကြီး ဈေးကြီးတဲ့တံဆိပ်အစား ပစ္စည်းအရည်အသွေးလည်းမည့် ဈေးနှုန်းလဲ သက်သာတဲ့ အမျိုးအစားတွေ ပြောင်းလဲသုံးစွဲကြတယ်။ တချို့ဆိုရင် နာမည်ကြီးတွေထက် အများကြီး ပိုကောင်းနေတာ အံ့သြစရာ သွားတွေ့ရတယ်။ စာထဲမှာ အသေးစိတ်တွေရေးရရင် သိပ်ရှည်လျားနေလိမ့်မယ်။ ချုပ်ပြီးပြောရရင်တော့ သူ့ နည်းစနစ်ကို တကယ်လက်တွေ့ ကျင့်သုံးရာမှာ အခက်အခဲ မကြုံရဘူးလို့ပဲ ဆိုရမှာပါ။ ကျွန်တော်တို့ စိတ်ချမ်းချမ်းသာသာနဲ့ပဲ အကောင်အထည် ဖော်နိုင်ခဲ့ကြတယ်။ ဒီအစီအစဉ်အတိုင်း လုပ်ခဲ့မိတဲ့အတွက် ကျွန်တော်တို့ အများကြီး စိတ်သက်သာ ပေါ့ပါးသွားခဲ့ရပြီ။ အရင်ကလို မကျေနိုင်တဲ့ ကြွေးတွေရဲ့ ခြိမ်းခြောက်နှိပ်စက်မှုဒဏ် မခံရတော့ဘူး။ ပိုက်ဆံအိတ်ကိုလှုပ်ကြည့်ရင် အသံမြည်နေရမယ်ဆိုတဲ့ သြဝါဒအတိုင်း စုဆောင်းခဲ့တဲ့ ဝင်ငွေ ရဲ့ ဆယ်ရာခိုင်နှုန်းအကြောင်း ပြောရအုံးမယ်။ အစပိုင်းတလျှောက်လုံးတော့ ကျွန်တော်တို့ တကယ် လည်း လှုပ်ကြည့်နေခဲ့ကြတာပဲ။ မရယ်ပါနဲ့ နော်။ အဲဒါက တကယ်လည်း စိတ်ချမ်းသာစရာ ကောင်း တာပါ။ လက်ငင်းသုံးစွဲစရာမလိုဘဲ အပိုဆာဒါး စုဆောင်းထားနိုင်တဲ့ ပိုက်ဆံလေးရှိနေတာ တကယ် ပျော်စရာ။ တိုးသထက် တိုးပွားလာတာလေးကို ရေတွက်နေရတာဟာ သုံးရတာထက်တောင် အရသာ ရှိပါသေးတယ်။ ပိုက်ဆံအိတ်ကို စိတ်ကျေနပ်အောင် လှုပ်ကြည့်နေပြီးတဲ့နောက်မှာ ဒီစုငွေကို ပိုအကျိုးရှိအောင် အသုံးပြုဘို့နည်းလမ်း ကျွန်တော်တို့တွေ့ခဲ့တယ်။ လစဉ်ဝင်ငွေရဲ့ ဆယ်ရာခိုင်နှုန်းကိုပဲ မှန်မှန်ထည့်ဝင် သွားလို့ရတဲ့ ရင်းနှီးမြှုပ်နှံမှု့တခု ကျွန်တော်တို့ပြုလုပ်ခဲ့တယ်။ ကျွန်တော်တို့ရဲ့ ပြန်လည်ထူထောင်ရေး အစီအစဉ်မှာတော့ ဒါက အားတက်စရာအကောင်းဆုံး အစိတ်အပိုင်ပဲ။ ဒါကျွန်တော့်ငွေနဲ့လုပ်တဲ့ ပထမဆုံး ရင်းနှီးမြှုပ်နှံမှု့တခု ဆိုပါတော့။ အခုဆိုရင် ရင်းနှီးမြှုပ်နှံမှု့အလုပ်က မှန်မှန်ကြီး ကြီးထွားတိုးတက်နေပြီ။ ဒါကိုသိနေရတဲ့ အတွက် လည်း ကျွန်တော်တို့မှာ အင်မတန် ကျေနပ်အားရနေရတယ်။ နောင်ရေးအတွက် စိတ်အေး နေရ တယ်။ ကျွန်တော် အငြိမ်းစားယူတဲ့ အချိန်လောက်ရောက်ရင် ဒီငွေရင်းက အတော့်ကိုများနေ လောက်ပြီ။ သူက ရတဲ့ဝင်ငွေနဲ့ တင် ကျွန်တော်တို့ တသက်လုံး စိတ်အေးလက်အေး စားသောက် နေထိုင် သွားနိုင် လောက်ပြီ။ ကြည့်စမ်း၊ အဲဒါအားလုံးဟာ ကျွန်တော့်ငွေတွေချည်ပဲ။ ရုတ်တရက်ဆို ရင် ယုံနိုင်စရာတောင် မရှိဘူး။ ဒါပေမယ့် တကယ်အမှန်ပဲ။ လောလောဆယ် ကျွန်တော်တို့ ကြွေးတော်တော်များများ ကျေသွားပြီ။ ကျန်တာတွေ မှန်မှန်ဆပ်နေနိုင်တယ်။ တချိန်တည်းမှာ ကိုယ်ပိုင်ငွေကလည်း တိုးပွားလာနေ တယ်။ ပြီးတော့ နေ့စဉ်နေထိုင် သုံးစွဲမှု့ဘဝကလည်း အရင်ကထက် အများကြီး ချောင်ချောင်လည်လည်ရှိတယ်။ ငွေကို စနစ်ဇယားမရှိ သုံးစွဲနေရာက စနစ်ဇယားချပြီး သုံးစွဲလိုက်တာနဲ့ တင် ဖြစ်ပေါ် လာတဲ့ အပြောင်းအလဲက မယုံကြည်နိုင်လောက်စရာပဲ နောက်နှစ်ကုန်ရင် ကျွန်တော်တို့ ကြွေးအားလုံးကျေပြီ။ အဲဒါဆိုရင် စောစောကကြွေးဆပ်ဘို့ ဖယ်ရတဲ့ငွေကို ရင်းနှီးမြှုပ်နှံတဲ့အထဲထည့်နိုင်ပြီ။ အဲ၊ ခရီး တခေါက် တော့ ထွက်ကြအုန်းမယ်လို့ ကျွန် တော်တို့ စဉ်းစားထားတယ်။ သို့သော် ကြွေးကြေသွားပြီး တဲ့နောက်မှာ လည်း ပုံမှန်အသုံးစရိတ်ကို ဝင်ငွေရဲ့ ခုနှစ်ဆယ်ရာခိုင်နှုန်းထက် မတိုးမြှင့်ဘို့ တော့ ကျွန်တော်တို့ ဆုံးဖြတ် ထားပါတယ်။ ခုလောက်ဆိုရင်တော့ ကျွန်တော်တို့ဘာကြောင့် အဲဒီ ရှေးဘေဘီလုံသားကြီးကို ကျေးဇူးတင်ရတယ် ဆိုတဲ့ အကြောင်း ရှင်းလောက်ပါပြီ။ သူက ကျွန်တော်တို့ကို ကြွေးနွံထဲမှာ ဘဝဆုံးရတော့မယ့် အဖြစ်က ကယ်တင် ခဲ့ တာပါ။ ကျွန်တော်တို့ရောက်ခဲ့တဲ့ အနေအထားရဲ့ ဆိုးရွားပုံကို သူအသိဆုံးပါ။ သူက ကျွန်တော်တို့ ထက်မက ကြုံခဲ့ရတဲ့သူကိုး။ သူ့ရဲ့ခါးသည်းလှတဲ့ အတွေ့ အကြုံတွေကနေ တခြားလူတွေ သင်ခန်းစာ ယူစေချင်လို့ အရေးရခက်လှတဲ့ ရွှံ့စေးစာချပ်တွေမှာ အချိန်အများကြီးပေးပြီး သူရေးခဲ့တာ။ | သူ့နည်းတူကြုံရမယ့် နောက်လူတွေအတွက် သူ့ရဲ့ အသိပေးပြောကြားချက်တွေဟာ တကယ့်ကို တန်ဘိုးကြီးလှပါတယ်။ တန်ဘိုးကြီးလွန်း အရေးပါလွန်းလို့လည်း အခုလို နှစ်ပေါင်းငါးထောင်ကျော် ကြာပြီးတဲ့အချိန်မှာတောင် မြေကြီးထဲက ပြန်ထွက်လာရတာ။ ဘေဘီလုံရဲ့ အပျက်အစီးတွေကြားက ပြန်လည် ဆယ်ယူရရှိခဲ့တဲ့ ဒီစာချပ်ပါ ရေးသားချက်တွေဟာ ပုဂ္ဂိုလ်ကြီးဒါဗာဆား ရေးထွင်းစဉ်က အရေးပါခဲ့ မှန်ကန်ခဲ့သလို ဒီကနေ့မှာလည်း အရေးပါဆဲ မှန်ကန်ဆဲပါပဲလို့ ဆိုလိုက်ချင်ပါ တယ်။
လေးစားခင်မင်စွာဖြင့်
အဲဖရက်အိပ်(ချ)ရှရူး(စ)ဘာရီ
ရှေးဟောင်းသုတေသနဌာန